ویسے تو انٹرنیٹ کی دنیا میں ہر ای میل ، سوشل میڈیا سمیت لگ بھگ ہر ویب سائٹ پر ممبرشپ کی صورت میں صارف کو کوئی نہ کوئی پاس ورڈ تو رکھنا ہی پڑتا ہے مگر کیا وہ ہیکرز کی گرفت میں آنے سے بچ بھی سکتا ہے یا نہیں؟
اگر آپ اپنے پاس ورڈ کو بہترین سمجھتے ہیں تو 2016 کے 25 بدترین پاس ورڈز کی یہ فہرست دیکھ لیں اور پھر فیصلہ کریں کہ کہیں آپ بھی ان میں سے کسی کو استعمال کرکے خود کو محفوظ تو نہیں سمجھ رہے؟
کیپر نامی انٹرنیٹ سیکیورٹی کمپنی نے 2016 میں لیک ہونے والے ایک کروڑ پاس ورڈز کے ڈیٹا کی بنیاد پر25 بدترین پاس ورڈز کی فہرست مرتب کی ہے اور اس میں پہلا نمبر ہمیشہ کی طرح 123456 کے نام رہا ہے۔
اگر یہ آپ کا پسندیدہ پاس ورڈ ہے تو معذرت کے ساتھ کہنا پڑے گا کہ یہ 2011 سے مسلسل ہر سال بدترین پاس ورڈ قرار پایا ہے۔
تاہم 2016 میں طویل عرصے بعد دوسرے نمبر پر رہنے والے لفظ password کی جگہ 123456789 نے لی جبکہ تیسری پوزیشن کا ' اعزاز ' qwerty کے نام رہا جبکہ چوتھے پر 12345678 اور پانچویں پر 111111 موجود ہے۔, کمپنی کا کہنا تھا کہ 2016 میں سب سے زیادہ استعمال ہونے والے پاس ورڈز کی فہرست دیکھیں تو ہمارے لیے افسوس سے اپنے سروں کو ہلنے سے روکنا مشکل ہوجائے گا، یہاں تک کہ سرفہرست 15 میں سے سات پاس ورڈز چھ حروف یا اس سے بھی چھوتے ہیں۔
اس کا مزید کہنا تھا اگر ویب سائٹس کی جانب سے لوگوں کو اس طرح کے پاس ورڈز کے ذریعے اکاﺅنٹس پر کام کرنے کی اجازت دی جاتی ہے تو یہ ان کی لاپروائی یا دیوانہ پن ہے۔
